السلام عليكم يادكتور

وعليكم السلام ورحمة الله وبركاته يا استاذ علي

ممكن سؤال ❓ اتفضل يااستاذ على

ايه رائيك يادكتور في الغسيل الكلوي ❓
الغسيل الكلوي يا استاذ علي هو عباره عن علاج بديل من بدائل الكلى بيتم ثلاث مرات أسبوعيا لتنقية الجسم من السموم اللي بتفرزها الكلى.

طيب ممكن سؤال تاني ازاي بيتعمل الغسيل ده  ❓

الأول لازم تفهم الكلام اللي هقولهولك ده كويس

أولا
امتى لازم المريض يبقى عارف انه حتما ولابد هيغسل

أقولك  يااستاذ على

في حاله ارتفاع وظائف الكلى وثبات هذا الارتفاع وخصوصاً عند مرضى الضغط والسكر وبعد عمل اشعة تلفزيونية على الكلى وعدم وجود سبب عضوي مسبب لارتفاع وظائف الكلى

واخد بالك معايا

لازم ساعتها نعمل تحليل تصفيه الكلى اسمهEGFR
وحسب نتيجة التحليل ده بنتصرف
والنتيجة واحد من ثلاثة

الأول
 النسبة تطلع أكبر من 30 ودي العيان بياخد علاج عند دكتور الكلى

الثانية
 النسبة أقل من 30 ودي معناها ان المريض متوقع يغسل خلال 6اشهر عشان كدة لازم ولابد يدور على بديل للكلي

ايه يادكتور اللي بتقوله ده هو فيه حاجة اسمها بديل للكلي ❗ ❗

ايوه يا استاذ علي وبدئل الكلى حاجتين

الاولى عمل زرع كلي
والتانية الغسيل الكلوي

يعني اما يوصل التحليل ل30 يادكتور لازم ازرع كلي أو اغسل

طيب ما سعات الواحد مبيشكيش من أي أعراض ايه اللي يخليني اسمع الكلام ده واغسل يادكتور ❓

انت فتحت نقطه مهمه خالص وكل الناس بتغلط وبتوقع فيها يااستاذ على

اقولك انا ليه

لأن بعد النقطه دي بتبدأ السموم بتتراكم في الجسم وبتاثر على النخاع وتعمل انيميا شديده
بتأثر على القلب وتعمل ضعف في عضله القلب
بتأثر على العظام وتعمل هشاشة والم في كل عظام الجسم
بتأثر على الشرايين وتعمل تصلب في الشرايين
بتأثر على الرئة وتعمل تجمع مائي على الرئة وبتعمل ارتشاح مائي على الرئة وكمان أزمات تنفسبه حاده
وبتاثر على أنسجة المخ وتدخل في غيبوبة

لاقدر الله

وبعدين كل الحاجات دي بيقل حدوثها في حالة بدء الغسيل مبكرا
اعتقد انك فهمت السبب اللي يخليك تبدأ غسيل بدري قبل ظهور الأعراض دي

الثالث
 أن النسبة تكون أقل من 15 وده معناه يجب عمل الغسيل الكلوي

طيب يا دكتور معلش في السؤال الغسيل ده بيتم ازاي ❓

فيه كذا طريقه
أولا الغسيل الطارئ يعني مريض ساب نفسه لحد ماحصلت المضاعفات اللي قلنا عليها
ده بيركب قسطرة مركزية بيغسل منها الناس بتعرفها بأسم الماروكا ودي وسيلة مؤقته وبتتركب في الرقبه أو خن الورد
ولها مضاعفات مثل حدوث التهاب وصديد حدوث جلطة في الوريد حدوث ضيق في الوريد ودي بتقلل فرص نجاح عمليات الوصلات الوريديه الشريانية

الطريقة الثانية

عمل وصله للغسيل الكلوي طبيعية أو صناعية حسب حاله كل مريض وهي الأفضل للمريض والمريض بيغسل منها فترة أطول واقل عرضه لحدوث الالتهابات والمضاعفات

طيب ايه احسن وقت لعمل الوصلة الوريدية الشريانية لمرضى غسيل الكلى ❓

احسن وقت هو عندما يصل تحليل EGFR and إلى 30
عشان الآتي

المريض في أحسن حالاته ويستحمل إجراء العملية
إعطاء فرصة لنضج الوصلة والتي تاخد على الاقل 45الي90 يوم في بعض الأحيان
تجنب تركيب القساطر المركزية ومضاعفاتها اللي اتكلمت عنها
والتي تقلل فرص نجاح عمليات الوصلات الوريديه الشريانية للغسيل الكلوي

متشكرين يادكتور
العفو يا استاذ علي

عيادة الدكتور عبدالرحيم فتحى لجراحة الاوعية الدموية و القسطرة التداخليه وعلاج القدم السكري ودوالي الساقين وعمل وصلات الغسيل الكلوي

قنا أمام مستشفى قنا العام عماره منصور شيفروليه بجوار خير زمان يوميا ماعدا الجمعه للحجز والاستعلام 01011297491